Kaina sang aga nasaksihan ang panugod sang Biodiversity Conservation kag Nature Tourism Center sa Barangay San Fernando sa Talisay City.
Gin pamunuan ni Negros Occidental Governor Eugenio Jose Lacson kag Third District Congressman Francisco Benitez ang groundbreaking ceremony sa Sito Pulak-Pulakan naga naga lapad sang 60 ka ektarya.
Kabahin ini sang tikang sang probinsya nga mapangapinan ang palibot labi na ang pag amlig sa nabilin nga kagulangan kasubong man sa flora kag fauna.
Suno kay Lacson, ang lugar gina paabot nga mangin masunod nga Mambukal gani isa ini ka palaabuton nga tourist destination.
Nag pananom man kaina sang kawayan. Maga serbe man ang lugar bilang iconic center nga maga pasundayag sang structures nga naga gamit sang kawayan. Pagatukuron diri ang isa ka multi-purpose hall, observatory tower, livelihood center kag bisan pa bamboo treatment facility.
90 milyones pesos ang gina pain nga pondo para diri sa kada tuig suno kay Provincial Administrator Rayfrando Diaz.
Maga file naman si Third District Congressman Francisco Benitez sang hagna nga maga
deklara sang lugar bilang isa ka eco-tourism site.
Sa ini nga pamaagi mahimo nga ang TIEZA ukon Tourism Infrastructure and Enterprise Zone Authority maka pain sang pondo para sa pag pakaayo sang dalan. Gina lantaw ni Benitez nga mag file sang amo nga bill pagkatapos sang semana santa.
Maga depende naman sa komitiba ang pag idog sang hagna. Labing ginapasalamatan naman sang komunidad ang proyekto nga maga hatag man sang dugang nga palangabuhian sa ila.