May mga action plans na nga ginhanda ang kapulisan hinali magtaas ang kaso sang kinawatay sa siudad sang Bacolod bangud sa padayon nga pagtaas sang presyo sang gatong.
Ginsiling ni Bacolod City Police Office Director Colonel Eugene Rebadomia sa isa ka press conference Miyerkules sang aga nga may posibilidad nga ang pagtaas sang presyo sang gatong magatuga sang domino effect.
Posible suno sa iya nga kon magtaas na ang presyo sang mga balaklon, magataas man ang kaso sang kinawatay, rason nga nagahanda na ang kapulisan sa amo nga sitwasyon.
Padayon man ang pag-monitor sang kapulisan sa mga gasolinahan sa siudad matapos nga ginhaylo ni Mayor Greg Gasataya ang PNP nga magbulig inspect sa pagpatuman sang insakto nga price range.
Dugang ni Rebadomia, may isa na ka gasolinahan sa Barangay Mansilingan ang ila una nga ginkadtuan bangud sa overprice nga pagbaligya.
Gilayon naman nga ginbalik sang amo nga gasolinahan ang insakto nga presyo matapos makadtuan sang pulis.*
[sibwp_form id=1]