Matapos nga nasalisihan sang peke nga kwarta ang duha ka mga nagabaligya sang prutas sa Libertad Market sang tinalikdan nga semana, nagpaandam na ang Bacolod City Police Office sa mga business owners tuhoy sa posible nga paglapta sang peke nga kwarta.
Nagpadulong sa talatapan ni City Administrator Atty. Mark Steven Mayo ang duha ka manugbaligya matapos nga suno sa ila nakabaton sila sang apat ka 1,000 pesos kag isa ka 500 peso bill nga fake money.
Nagpakuno-kuno nga tagalog speaking ang suspek suno sa ila kag madamo ini sang ginpamakal, apang matapos nga naghalin ini, didto na nila nasuspetsuhan nga peke ang kwarta nga ginbayad sa ila.
Ginpa-assess sa City Treasurer’s Office kag nakumpirma nga peke.
Ginsiling ni BCPO Director Colonel Eugene Rebadomia nga posible nga madamo sa karun sang naga pamentaha sa mga baligyaan bangud sa kasakuon sang siudad sa MassKara Festival.
Ginapaandaman na sang kapulisan ang mga vendors kag business owners nga lantawon anay sang maayo ang kwarta nga ginabayad sa ila antes ini batunon agud malikawan ang kaangay nga insidente.
Panugyan naman sang BCPO sa mga dalagko nga negosyo, magbakal nalang sang scanner agud masiguro nga indi peke ang kwarta nga ila mabatunan, ilabi na kun dako nga kantidad.
[sibwp_form id=1]