Bashayanay sang tubig sa pagsaulog sang Pista ni San Juan ang ginapaiway agud man malikawan ang disgrasya.
Napaidalom sa Alert Level 1 ang Bacolod, pero nagapangabay gihapon ang pamunuan sang Local Disaster Risk Reduction Management Office nga kun mahimu mapaiway ang pagtililipon kadungan sang pagsaulog sang Pista ni San Juan sa Biernes.
Suno kay Eunice Ciocon, pamuno sang Research and Planning Division sang DRRMO, ila man gina-discourage ang naandan nga pagbasyahanay sang tubig ilabi na sa mga dalanon agud mapaiway ang mga disgrasya kag tungod nagapadayon pa ang Covid-19 pandemic.
Gin-activate na sang DRRMO ang mga Barangay Emergency Unit agud man magbantay sa mga resorts kag baybayon nga ginapaabot dagsaon sang tawo.
Ang Barangay Punta Taytay isa lang sa mga coastal barangay sa Bacolod nga nagasaulog sang Pista ni San Juan.
Suno kay Punong Barangay Leah Palma, mangin kabahin sang ila tuigan nga pista ang tradisyunal nga basyahanay tubig.
Pero nagapangabay siya nga likawan ang pagbasya sang tubig sa mga nagalinabay nga salakyan.
Magahinyo man sang bulig ang barangay sa kapulisan kag mga tanod agud nga mapasiguro ang kalinong ilabi na sa mga resorts.
Nagligad lang man nga tuig sang ginpasira sang siudad ang mga resort bilang pagpangaman sa Covid-19 pandemic sang ginsaulog ang Pista ni san Juan.