Gina-review sa karon sang Bacolod City Legal Office ang Memorandum of Agreement nga ginpirmahan ni Bacolod City Mayor Greg Gasataya kag sang mga participating Barangays sang Electric MassKara may angut sa 300,000 pesos nga financial subsidy.
Ini matapos sa kontrobersyal nga natabo sa float sang Barangay Villamonte nga wala gintugutan nga mag parada bangud sa hitsura sini.
Ginsiling ni Atty. Marty Go, Secretary to the Mayor nga ang pag review sang CLO ang para mahibaluan ang nagakaigo nga tikang kun ang resulta sang float ang wala magasunod sa program of works nga ginpasa sang barangay.
Dugang ni Go, Setyembre pa lang ginmanduan na sang Gugma Foundation ang mga barangay nga mag submit sang ila MOA, apang last week of September na ini na kumpleto, rason nga amo man nga semana napasulod ini aa Sangguniang Panlungsod.
Oktubre 13 sang aga, nakuha na sang participating barangay ang subsidy magluwas lang sa Barangay 17 kag 19 nga may pending pa nga liquidation.
Nagpamalibad magpa interview sa atubang sang camera ang Punong Barangay sang Villamonte apang iya ginsiling nga handa man sila nga ipakita sa publiko program of works nga ila ginpropose.
Amo sini kuntani ang luyag nga ma achieve nga float sang Barangay, apang bangud sa kakulang sa preparasyon kag oras suno sa kapitan, wala ini mahuman.
Dugang pa niya, kun tugutan pa sila liwat nga mag intra sa masunod nga Electric MassKara, luyag man nila nga mag perform liwat.
Sa karun, ginmanduan na ang mga participating barangays nga magpasa sang ila liquidations.
[sibwp_form id=1]