Grade 5 pupil gin-alegar ginhimuslan kag ginbuno sa Guihulngan City.
Wala na sang bayo kag underwear sang masapwan nga patay na ang Grade 5 pupil sa sulod sang kampo sa Sitio Pinasagan, Barangay Linantuyan sa Guihulngan City, Negros Oriental, Martes nga adlaw.
May madamo man nga buno sa lawas ang 10-anyos nga babaye.
Sa follow-up operation, nadakpan ang suspek nga ginkilala kay alyas “Wil,” 33-anyos, isa ka mangunguma kag residente sang nasambit nga barangay.
Narekober man ang kutsilyo nga gingamit sa krimen kag iban pa nga mga ebidensya.
Nag-gwa sa imbestigasyon nga nagalakat ang bata upod ang iya 71-anyos nga lola pakadto sa gina-tambayan sang suki sini nga habal-habal nga amo ang nagadul-ong kag nagasugat sa biktima sa eskwelahan.
May kalayuon nga masobra isa kag tunga ka kilometro gikan sa ila balay ang lalakton sang mag-lola.
Nakibot na lamang ang lola nga wala na nagasunod ang iya apo gani iya ini ginsugat apang bangkay na sang iya masapwan ang biktima.