Nasapwan ang bangkay sang 27-anyos nga babaye sa sulod sang katubuhan nga sakop sang Sitio Palao, Barangay Balintawak sa Escalante City kahapon, Lunes.
May pilas sa ulo ang biktima kag ang iya underwear ang yara na sa iya kilid.
Residente sang Barangay Washington sa Escalante ang biktima kag may duha ka mga kabataan.
Suno sa panaysayon sang iloy, naglisensya ang iya bata nga mamista sa Sitio Palao.
Mga las 9 sang gab-i sadtong Domingo, sang nagpabalo ang biktima sa iya mga kaupdanan nga mangihi ini, apang wala na nakabalik.
Ginpangita sang ginikanan ang ila bata tubtob las 11 sang gab-i apang napaslawan sila.
Lunes sang aga, gin-usoy liwat sang ginikanan ang katubuhan malapit sa lugar nga may pista.
Nakita sang iloy ang tsinelas sang biktima sa kilid sang katubuhan gani iya ginsulod ang kampo, kag didto nadiskubrehan ang bangkay sang iya bata, mga 4 metros ang kalayuon sa dalan.
Nag-request na ang Escalante PNP sang bulig sang Provincial Forensic Unit agud mahibaluan ang gintunaan sang kamatayon sang biktima.