Ginakabig nga high value individuals ang mag-asawa nga nadakpan sa buy-bust operation sa Purok Mabinuligon, Barangay 35 sa Bacolod City, mga las 2:43 sang kaagahon sadtong Sabado, Hulyo 25.
Nakuha ang masobra P5.4 Million nga balor sang suspected shabu sa mag-asawa nga bag-o lang nakasal nga sanday alyas “Gard”, 44-anyos kag alyas “Ann”, 31-anyos, pareho nga residente sang Brgy. Singcang-Airport sa Bacolod.
Base sa impormasyon nga nabaton sang kapulisan gikan sa confidential informant, aktibo nga nagapakigbahin sa illegal drug trade ang mag-asawa sa Barangay 35 kag Singcang-Airport.
Suno sa pulis, ang ini nga impormasyon ang na-validate sa ginpatigayon nga casing kag surveillance operations.
Na-recover sa ila ang lima ka dalagko nga pakete sang suspected shabu, pulo ka nabugkos nga plastic bag nga may unod nga ginasuspetsuhan shabu, tricycle kag P7,000 nga buy-bust money.
[sibwp_form id=1]