Ginpaathag sang Department of Health Region 6 nga naga pabilin sa alert level 2 ang siudad sang Bacolod kag ang Iloilo city pa lang sa Region 6 ang ipaidalom sa alert level 3 sumugod Lunes.
Ginsiling man ni Dr. Edwin Miraflor, officer in charge sang City Health Office kag deputy sang emergency operations center nga wala pa sang panibag-o nga mga restrictions nga igapatuman ang Bacolod nga napaidalom gihapon sa alert level 2.
Humalin sang nagliligad nga binulan yara lang sa single digit ang Covid-19 cases sang Bacolod pero kahapon naglab-ot ini sa 34 new cases.
Isa man ka 38 anyos nga returning overseas Filipino nga nagbisita sa iya misis nga naga-trabaho sa call center firm sa siudad ang nalatnan sang Omicron variant pero fully recovered na.
Suno kay Miraflor, ang Inter-Agency Task Force lamang ang maka-desisyon angut sa mangin alert level sang siudad.
Sa karon ang pagpahugot sang border control amo ang tikang sang Emergency Operations Center para mapahagan hagan ang pagsaka sang kaso sang Covid-19.