Sa sulod sang apat ka semana, siudad sang Bacolod ang naka record sang 11 ka kaso sang leptospirosis, isa ang patay.
Pero, ini ang partial unofficial pa nga report bangud ini ang datus sang isa pa lamang ka ospital.
Suno kay Dr Grace Tan ang pamuno sang Environmental Sanitation Division sang City Health Office, padayon pa ang ila nga monitoring sa kaso sa tanan nga ospital sa Bacolod.
Agudto mapamatukan ang balatian, ang CHO ang naga hatag sang libre nga prophylaxis sa mga health center para sa yadtong naka ubog ukon wala malikawan naka ubog sa tubig baha, labi na karon nga tig-ululan kag sa pag-igo man sa mga bagyo.
Pero, wala diri naga untat ang kampanya sang CHO.
Suno kay Tan dapat nga mag mangin matinlo sa palibot. Ang pag duging sang basura nga naga serbe nga breeding ground sang ilaga nga amo ang number 1 carrier sang masakit nga leptospirosis ang naga pasaka sang tiansa sang pag lapta pa gid sang balatian.
Ang Negros Occidental humalin sang November 4 lamang naka record sang 90 ka kaso sang suspected leptospirosis, apat ang patay. Naga pahanumdom si Governor Eugenio Jose Lacson sa mga pumuluyo nga halungan ang ikaayong lawas labi na ang tiil kun indi malikawan nga mag ubog sa baha.*