Ginpaidalum sang Sanguniang Panlungsod sang Bacolod City sa state of calamity ang siudad bangud sa halit sang Red-Striped Soft Scale Insect ukon RSSI nga peste sa katubuhan.
Ini matapos nga nagahatag sang isa ka endorsement letter si Bacolod City Mayor Greg Gasataya sa SP nga nagahingyo sa pag deklara sang state of calamity bangud sa agricultural kag economic crisis dala sang peste sa siudad.
Ginsiling ni Councilor Jude Thaddeus Sayson, pamuno sang Committe on Agriculture and Agrarian Concerns yara sa 3,056 hectares ang katubuhan sa siudad kag 2,000 diri ukon 65.45 percent ang apektado sang RSSI.
Nagdangat man sa 100 tubtob 200 million pesos ang kapierdehan sang mga sugarcane planters bangud sa RSSI.
Matapos nga mapaidalum sa state of calamity ang siudad, may financial assistance nga ihatag para sa mga naapektohan nga mga mangunguma.
Wala pa matumod kun pila ang apektado nga mangunguma sa siudad.
Dugang ni Sayson, kinahanglan nga magpadulong ang mga mangunguma sa City Agriculturist Office kag Sugar Regulatory Administration agud makapalista.
SRA ang magapagwa sang kumpleto nga listahan sang mga kwalipakido nga mangunguma nga makabaton sang ayuda.
[sibwp_form id=1]