Natumba kag nalampos ang ulo sang babaye nga backrider matapos madanlog ang ila motorsiklo sa Circumferential Road, Bangga Phase 3, NHA Village sa Barangay Pahanocoy, Bacolod City, Miyerkules nga adlaw.
Gindala ang 38-anyos nga back-rider kag ang lalaki nga driver sang motorsiklo matapos makaangkon sang mga pilas, sa Bacolod South General Hospital apang gindeklarar ang babaye nga dead on arrival.
Naggwa sa traffic investigation nga padulong west sang dalan kag naga-usoy sa outerlane ang motorsiklo sang duha.
Nagsaylo sa inner lane ang motorsiklo, nga ginamaneho sang 42-anyos nga lalaki apang nadanlog ini, rason nga natumba sila.
May duha ka mga helmet sa lugar sang insidente, ang isa suksok sang driver, samtang ang isa ang yara na sa semento.
Sa pihak nga bahin, base sa alegasyon sang nakakita sa insidente, ginlapakan sang isa ka Ranger nga salakyan nga nagaduag gray ang backrider matapos sila ang natumba.
Ang Ranger nga pickup truck, suno sa saksi, ang nag-overtake bisan natumba na ang duha ka mga naka-motorsiklo.
Apang suno kay Police Major Elmer Bonilla, chief sang Traffic Enforcement Unit, nadanlog ang motorsiklo kag wala sila nalab-ot sang pickup.
Apesar sini, ginahangyo sa gihapon ni Bonilla ang saksi nga maggwa agud maghatag kasanagan sa imbestigasyon kag agud mapangita kag makasuhan ang driver sang pickup kung mapamatud-an nga may sala siya.
[sibwp_form id=1]