Pinaka una nga kaso sang African Swine Fever sa Negros Occidental ang na-record gikan sa banwa sang Pulupandan.
Sa laboratory result gikan sa Department of Agriculture-Bureau of Animal Industry nag positive sa ASF ang ginpadala nga sample gikan sa Barangay Mabini.
As of press time, ginsiling ni Governor Eugenio Jose Lacson nga wala pa sila sang may gina uyatan nga dokumento nga maka kumpirma sini.
Pero, suno sa iya naga patuman na ang probinsya sang mga tikang angut sa pagsulundan sang BAI.
Iga-isolate suno sa iya ang natungdan nga area nga magasakop sang 500 meter radius.
Wala sang may maka gwa ukon maka sulod nga baboy. Sa sulod ang 15 ka adlaw ipatuman ang observation kag kun indi na masulit pa ang kaso, paga kabigon ang insidente nga isolated case.
Kun may yara sang magadugang nga kaso, sa gihapon pagasundon sang probinsya ang BAI protocol.
Klaro sang gobernador wala sang culling ukon pag pamatay sang baboy nga ipatuman.
Panawagan sang gobernador nga mag halong kuntani sa mga deklarasyon bangud naga ka apektuhan ang mga hog farmers kag ang bilog nga industriya.
Madamo pa sang healthy nga baboy sa probinsya suno kay Lacson.
As of May 30 nagdangat sa 93.1 million ang kahalitan dala sang pagkapatay sang masobra sa 7,000 ka mga baboy.
Yara naman sa DA kun magpatigayon pa sang separado nga sampling sa mga baboy sa probinsya.