Nakuhaan sang closed-circuit television camera footages ang pag-snatch sang cellphone sang isa ka babaye sa Lopez Jaena Street, Barangay 31 sa siudad sang Bacolod, Domingo sang gab-i.
Ang suspek, nakasakay sa motor kag wala sang helmet.
Suno sa amo sang biktima, pangayaw kag bag-o lang sa Bacolod ang babaye, nga taga Himamaylan City, rason nga wala gid ini maghuna-huna nga amo yadto ang matabo sa iya.
Nagahulat sang order ang babaye sa isa ka food delivery service kag magasaylo kuntani ini sa pihak nga dalan agud tabuon ang driver.
May kaistorya ang babaye sa cellphone sang naghinay-hinay ang suspek kag gin-agaw ini.
Nadala ang buhok sang biktima sa pagbutong sang suspek sa cellphone.
Nag-isi-isi ang motor sang suspek apang gilayon ini naka-balanse kag nakapalagyo, samtang ang biktima nagdalagan pabalik sa balay sang iya amo.
Nagpauli ang biktima sa ila balay sa Himamaylan kag natalana nga magparekord sa Station 6 kun makabalik na ini sa Bacolod, suno pa sa iya amo.
[sibwp_form id=1]