Suguran na sa Bacolod City bwas aga ang pagbaton sang walk in applicants kag paghatag insigida sang ayuda para sa Assistance to Iindividuals in Crisis Situations ukon AICS.
Ini ang ayuda para sa mga estudyante nga in crisis para magamit sa pag bakal sang school supplies, projects, allowance kag iban pa nga balayran.
Sandig sa guidelines sang Department of Social Welfare and Development, ang mga working student, anak sang solo parent, anak sang OFW, may ginikanan nga may HIV, ilo ukon wala na ginikanan, wala trabaho ang ginikanan, biktima sang pag abuso kag biktima sang kalamidad ang pwede maka baton sang ayuda.
Isa ka libo ka pesos para sa elementary, dos mil pesos para sa high school, tres mil para sa senior high school kag kwatro mil pesos para sa college.
Suguran ini bwas aga sa 4th floor sang Ayala Malls Capitol Central sa likod sang Kapitolyo.
“First come, first serve ah. Mahatag lang kami sang number sa dalom sa chapel nga wing. Ma open ang mall kuno 9, pero 8 guro ara na ang taga DSWD galing asta man mag 9 sa gab-i.”
Suno sa Provincial Social Welfare and Development officer sang Negros Occidental nga si merle garcia, bisan benepisyaryo sang 4P’s ang pwede maka avail sini.
ID sang estudyante ang requirement pero kun wala pa sang id, pwede maka pangayo sang certification gikan sa eskwelahan nga maka pamatuod nga naka enroll ang estudyante.
“There are those students nga for example karon nga wala id, no need na. Ok na, i-consider but as long as may certification from the school nga enrolled sila.”
Pwede man ma email ang requirement sa ginhatag nga email adress sang DSWD.
Para sa elementary kag high school dapat upod ang ginikanan ukon guardian.