Pamuno sang Militar sa probinsya ang naga panawagan sa publiko nga indi pagsuportahan ang mga kandidato nga naga hatag man sang suporta sa rebeldeng grupo.
Ang pahanumdom may kaangtanan sa gina paabot nga eleksyon kun sa diin sa masami naga pangayo sang kwarta ang rebeldeng New People’s Army sa mga luyag magkampanya para sa ila gina tawag permit to campaign.
Pahanumdom sang militar nga dapat ang mga kandidato indi maghatag sa ila. Suno kay Col Orlando Edralin ang pamuno sang 303rd bridage sang Philippine Army, wala man sila sang may ma identify sa karon nga posible nga kandidato nga naga suporta pero subong pa lang naga panawagan na sila sa publiko nga indi pagsuportahan ang mga kandidato nga naga buylog kag suporta sa rebeldeng NPA.
Masupog ang kampanya sang Army kontra insureksyon. Pila sa mga matag-as nga lider ang na neutralize na nila kag nalakip na diri si Rogelio Posadas nga Secretary sang Komiteng Rehiyonal Negros-Cebu-Bohol-Siquijor. Indi malab-utan ang tapos tuig, suno kay Edralin ila gina paabot nga ma clear nila ang Central Negros 1 kag 2.