Tigayon na nga nagkalakit-an ang duha ka mga mananagat nga taga Valladolid kag duha pa gid nga missing man nga taga Cadiz City.
Suno sa kay Commander Jansen Benjamin ang Commanding Officer sang Philippine Coast Guard – Northern Negros Occidental, una nakita ang duha nga taga Valladolid nga ginkilala sanday Robin Fajardo, kag Jose Carlo Jurial, lunsay mga residente sang Brgy. Sagua Banwa sa Valladolid.
Biyernes las dose sang udto nagpalawod ang duha sang kaabtan sang ulan kag dalagko nga balud sa baybayon.
Sabado sang aga na rescue sila sang mga mangingisda sa baybayon na sang Silay.
Samtang, ang duha ka mga persona nga ginkilala sanday Edwin Hinojales, kag Joren Parochel sang Brgy. Zone 1, Cadiz City nga gin report nga missing ang nakalab-ot sa isla sang Nabugtot Placer, Masbate.
Isa ka concerned citizen ang nag post sa social media nga nakalab-ot sa amo nga isla ang duha gani nakalab-ot ang impormasyon sa ila mga himata.
As of press time suno kay Irene Bel Plotena ang pamuno sang Provincial Disaster Risk Reduction Management Office, naga hulat sang medical clearance ang duha para sila ang maka pauli sa Negros.