Anay bise gobernador Genaro Lim-ao Alvarez ang nagpatpat sang iya nga plano para sa Kabankalan. Panugyan niya naman sa iya nga mangin kasumpong sa mayoralty race: mangin sport lang.
Ginkakibot sang kadam-an ang pag-file ni anay vice governor Alvarez sang certificate of candidacy sa pagka alkalde sang Kabankalan.
Sa interview sang media iya ginsiling nga bisan ang iya kabataan wala man gani makahibalo nga maga papili siya.
Ngaa abi nga indi siya mag papili kay qualified man siya suno sa iya. Nag-file si Alvarez sang COC bilang independent candidate.
Pero iya ginsiling sa interview nga iya kaalayado si Alice Zayco-Gomez nga nag-file coc para sa pag ka bise alkalde.
Anak siya ni anay mayor Pedro Zayco kag hinablos ni mayoralty candidate Isidro Zayco.
Suno kay Alvarez, may napulo man siya ka mga konsehal sa iya nga slate kag ini sila mga punong barangay.
Kalakip sa pila niya ka mga program kun mangin mapalaron sa 2025 elections amo ang pagpatukod sang coliseum, pag pahuman sang airport sa Kabankalan kag pagpatukod sang 3 storey nga merkado.
Nakasugilanon man siya kay mayoralty candidate Zayco kag iya ginsiling sa iya nga indi na sila mag habuyanay pa sang issue.
Nakasugilanon man siya kay Mayor Benjie Miranda kag kun enkaso nga indi mangin mapalaron si Miranda kag asawa sini sa palaabuton nga eleksyon iya sila gina tanyagan sang obra.
Abiso niya sa mga kasumpong, wala lang sang lainay buot kag mangin sport lang.
“Nasugilanon ko na si Miranda. Naka intindi na na sila. Kabay pa nga matapos ang election nga waay lainay buot. Sport lang. Kun sila mag daog okay lang sa akon. Kun sila ma pierde kun gusto nila mag obra tagaan ko man sila obra”, suno kay Alvarez.