Anay Don Salvador Benedicto Mayor Cynthia dela Cruz ang nagtaliwan sini lamang.
Ini ang ginkumpirmar sang iya nga anak nga First District Board Member Laurence Marxlen dela Cruz.
Sini lamang nga udto nagtaliwan si anay Mayor Cynthia sa edad nga 73.
Suno sa board member mga tatlo naman ka tuig nga naga paidalom sa hemodialysis ang ila nga iloy.
Sang Miyerkules, samtang naga paidalom sa hemodialysis nag hemorrhagic stroke ang anay alkalde.
Nag pangalagad bilang alkalde si Cynthia sa sulod sang siyam ka tuig ukon tatlo ka termino suno kay Marxlen.
Ini sa tuig 1998 tubtob 2007, kag nangin bise alkalde naman siya 2007 tubtob 2013.
Gina plastar pa sang pamilya ang detalye sa haya ni anay mayor Cynthia.
Sa Facebook Page sang DSB LGU madamo ang nag pabutyag sang pag pakig-unong sa kasubo sang pamilya dela cruz sa pagtaliwan sang anay alkalde.
Naga pakig-unong ang Digicast Negros sa kasubo sang pamilya dela Cruz.”