Mayor Albee Benitez kag Department of the Interior and Local Government naga-paandam sa mga city employees kag job order workers batuk sa pag-intra sa pamulitika.
Sa Facebook post ni Councilor Israel Salanga ginpalab-ot sang alkalde ang paandam sa mga city employees ilabi na sa mga JO nga ipaiway ang pag pangampanya sa election.
Nag-ugat man ini sa reklamo sang pila ka mga benepisyaryo sang AICS kag AKAP sa alkalde nga nag-alegar ginakuhaan komisyon kag ginapatihan ginagamit sa pamulitika.
Karon nga nagahilapit ang mid-term elections, nagpahanumdom pati si DILG – Negros Island Region OIC – Director Lailyn Ortiz sa mga government employees batuk sa pag-endorso kag pag pangampanya sa mga pulitiko paagi sa social media.
Nakasaad sa pagsulundan sang Civil Service Commission ang pagdumili sa mga government employees angut sa electioneering kag partisan activity.
Bisan ang mga kapulisan ang napaandam na may angut man sa pagserbe sa mga pulitiko.
Sa filing pa lang sang certificate of candidacy sang nagligad nga Oktubre nagpahanumdom si Police Regional Office 6 Director Police Brigadier General Jack Wanky nga dapat magpabilin nga non-partisan ang kapulisan.