PNP gina usisa ang alegasyon sang pamilya sang napatay nga commercial sex worker nga ang bugaw nga gin utdan ulo, amo ang suspek sa kamatayon sang babayi
Nagapadayon sa karon ang imbestigasyon sang kapulisan angut sa kamatayon sang gina alegar bugaw nga si Mario Demetrio nga nasapwan patay kag gin utdan sang ulo sang Sabado sa siyudad sang Talisay.
Suno sa hepe sang Police Station 7 sa Bacolod nga si Captain Elmer Bonilla, ila subong nga gina usisa ang alegasyon sang pamilya sang napatay nga commercial sex worker, nga si Demetrio amo ang suspek sa pag patay sa babayi.
Damlag pa gin pahayag sang PNP nga si Demetrio amo ang bugaw sang commercial sex worker nga nasapwan patay sang Setyembre 8 sa kilid sang dalan sa Barangay Alijis.
Ginatudlo sang pamilya suno kay Bonilla nga si Demetrio amo mismo ang nagpatay sa sex worker. Wala gina dula sang PNP suno kay Bonilla ang posibildad nga si Demetrio amo suspek apang kinahanglan pa nila sang ebidensya.
Nagabuligay sa karon ang BCPO kag ang NOCPPO sa imbestigasyon sa kamatayon ni Demetrio kag padayon ang pag pat-od kun sin-o ang responsible sa pag patay sa iya.