Aksyon protesta sa ginbuhat sa kay anay Presidente Rodrigo Duterte ang gina paabot karon sa nagkalain-lain nga bahin sang probinsya.
Ini suno kay anay Victorias City Mayor Francis Frederick “Wantan” Palanca nga nag siling nga ang local nga PDP ang nagasapol sa national PDP para sa ila nga mangin tikang angut sa pagdakup kay Duterte matapos ginserbehan sang warrant nga gin papanaog sang International Criminal Court may kaangtanan sa crimes against humanity.
Suno kay Palanca, nga chairperson sang PDP-NIR, may yara sang aksyon sa Norte, sa Sur kag sa Bacolod City.
Sa Bacolod City Government Center gina paabot ang pagtipon las sais sang gab-i para sa candle lighting in solidarity sa anay presidente.
Gina abisuhan ang supporters nga magsuksok sang Black ukon green base sa mga group chats sang supporters.
Ang luyag sang PDP suno kay Palanca nga ang ila nga aksyon protesta ang sustainable.
Wala labot sini sila ang magatipon man sang simpatiya gikan sa kadam-an.
Suno kay Palanca ang natabo sa kay Duterte indi lamang concern sang PDP kundi concern sang kada Pilipino labi na nga mismo ang pungsod suno sa iya ang nag surrender sa anay presidente sa dumuluong.
Samtang, sa pahayag nga gin-release ni Victorias City Mayor Javier Miguel Benitez bilang presidente sang Association of Chief Executives, ginakilala nila ang kabug-aton sang nagkalatabo lakip na ang legal proceedings may kaangtanan kay anay Presidente Duterte.
Suno kay Benitez ang ini nga mga tion naga pahanumdom sa tagsa sa pagpabilin sang fundamental principles nga naga tib-ong sang demokrasya.
Siya ang naga panawagan sa mga Negrense nga mag tutok sa “bigger picture”.
Iya ginahaylo ang pagpatuman sang mga tikang nga maga duso pa abante sang probinsya.
“Ga meeting kami with the national kun ano gid. Kay te kun mag action protest kag mapatay, wala man na, correct? We need to have a sustained action protest, we need to have a gathering of sympathy from everybody. Ayawan ta gani papuli sa isa to sa East Timor, ang aton ya i-surrender ta lang dayon. Daw kasubo bala”, suno kay Palanca.