Mga abugado sang mga tagreklamu dako ang pagsalig nga paboran sang Election Registration Board ang pagpamatuk sa pag-transfer sang voters registration ni anay third district Congressman Alfredo Benitez sa Bacolod.
Ginsiling nanday Atty. Jose Jireh Alimon kag Atty. Marcus Aurelian Vaflor nga base sa natipon nila nga ebidensya halin sa titulo sang nabakal nga duta sang kongresista, cedula kag mga proof billing nagapakita nga indi siya residente kag wala man nagapuyo sa siudad.
Gani makabig nga indi siya eligible para magboto kag bisan magpapili sa Bacolod sa natalana nga May 2022 local elections.
Magluwas kay Benitez may 220 pa ka mga voter applicants nga nagtransfer sang voters registration ang ila ginpasakaan sang reklamu sa Comelec Bacolod.
Wala pa man nakadesisyon si Benetiz nga magpapili sa panawagan nga magpadalagan siya sa pagka-alkalde sang siudad.
Nagapati ang anay kongresista nga indi mangin madinalag-on ang reklamu batuk sa iya kag iya na gina paabot ang petisyon.
‘INDI POLITICALLY-MOTIVATED’
Ginsiling sang ila mga abugado nga indi ini pamulitika ang sa likod sang pag file sang reklamo.
Nalakip sa mga complainant sanday Hector Yula nga isa ka tricycle driver, Teodoro Abao nga anay kagawad kag Jonah Abao nga market supervisor sang siyudad.
Sa Lunes, natalana ang hearing angut sa reklamu batuk kay Benitez sa Bacolod Comelec Office.