May 91 ka mga healthcare workers sa karon ang nag positibo sa Covid-19 sa pito ka mga ospital sa Negros Occidental.
Ang operation sa Teresita Lopez Jalandoni Provincial Hospital sa Silay City ang apektado, matapos 55 sa frontliners sini ang nag positibo sa virus. Rason nga temporaryo gin-suspend ang regular services sang ospital nga naga lakip sang out patient department kag vaccination.
Sa advisory sang ospital, limitado and admission sa extreme emergency sumugod subong nga adlaw. Suno kay provincial administrator Rayfrando Diaz, may mga nag positibo man sa virus sa personnel sang iban nga ospital sang probinsya pero padayon sa gihapon ang regular nga operation sini.
Samtang, temporaryo nga gin-untat sang kapitolyo probinsyal ang vaccination activity sini sa Negros Residences kag maga resume sa madason nga semana. Suno kay Dr Ernell Tumimbang ang Provincial Health Officer, ginpaiway anay ini agudto malikawan ang posible super spreader nga activity.
Pero padayon naman ang vaccination sa tagsa ka mga local government unit. Padayon ang pagsaka sang kaso sang Covid-19 sa Negros occidental. Sa January 23 nga report sang Provincial Incident Management Team, 264 ang gin-report new cases sa amo nga adlaw.
2,006 na karon ang active cases sa probinsya. Nagpadala na sang specimen ang probinsya para sa genome sequencing. Tuman man kadasig ang pag lapta sang Covid-19 cases subong, pero suno kay Tumimbang, tubtob nga wala sang opisyal nga report gikan UP-Philippine Genome Center indi masiling nga omicron variant ang nag-igo sa Negros Occidental.