Siyam tanan ka mga alkalde sa Negros Oriental ang nagaduso sa karon nga ipaiway anay ang Barangay kag Sangguniang Kabataan Elections sa probinsya sang isa ka bulan agud mahatagan sang atensyon ang peace and order sa lugar.
Ang mga alkalde nga nagaduso sang postponement amo sanday Pamplona Mayor Janice Degamo, Dauin Mayor Galicano Truita, San Jose Mayor Mel Nick Logronio, Dumaguete City Mayor Felipe Antonio Remollo, Guihulngan City Mayor Filomeno Reyes, Bindoy Mayor Eniego Jabagat, Siaton Mayor Ceanne Fritz Diaz, Ayungon Mayor Dennis Amancio kag Tayasan Mayor Susano Ruperto.
May kaangtanan sa Pamplona Massacre ang pagduso sa postponement sang pinili-ay kun sa diin napatay si anay Governor Roel Degamo kag ang siyam ka iban pa nga ginakabig isa ka dako nga problema sa sitwasyon sang kalinong sa probinsya.
Ginahinyo sang mga alkalde ang Commission on Elections nga pamatian ang ila nga panawgan agud mahatagan sang tion nga dulaon ang kakulba sang publiko kag sang mga botante kag mahatagan sang patas nga electoral environment ang Negros Oriental.
Magapatigayon sang public hearing ang COMELEC Region 7 sa Hunyo 27 tubtob Hunyo 29 kag ang mangin resulta sini ang balasehan sang Comelec En Banc sa ila desisyon sa postponement.