Tigayon na nga ginpang-guba sang Bacolod City Legal Office Enforcement Team kahapon nga adlaw ang pito ka mga baligyaan nga nagpatukod sang permanent structure sa kilid sang South Capitol Road.
Ginsiling ni Retired Police Colonel Levy Pangue, pamuno sang CLO Enforcement Team nga makatatlo na sila ka beses nga magbalik sa amo nga lugar apang nagabalik ini sa gihapon.
Una na nga gin clear ang amo nga area sang Oktubre nagligad nga tuig kag Pebrero sini man nga tuig.
Matapos nga ginpang-guba liwat ang amo nga mga istruktura, ginamanduan na sang siudad ang pamunuan sang Barangay 9 nga ipabilin nga hilway sa illegal structures ang amo nga area.
Kun magbinalik pa gid ini liwat, posible nga pasakaan na sang CLO sang administrative case ang punong barangay.
Suno kay Pangue, ginatugutan nga magbaligya sa lugar apang kinahanglan nga movable ang mga ini kay ginadumilian sang Department of Interior and Local Government ang pag patukod sang permanent structures sa mga sidewalks.
Kadungan sini, may anom man ka istruktura sa atubang sang 888 ang gindemolish kag apat naman sa may area sang BACIWA nga sakop sang Barangay 10.
Kaina sang aga, nagapadayon man ang clearing sang CLO sa dalan Palanca kon sa diin may isa ka vulcanizing shop ang tigayon man nga ginkakas sa higad sang dalan.*
[sibwp_form id=1]