Bacolod Emergency Operations Center ang nagaduso sang bag-o nga pagsulundan para sa mga magapinauli nga overseas Filipino workers gikan sa mga pungsod nga may yara sang bag-o nga variant sang COVID-19.
Ginpahayag sang executive director sang Bacolod EOC nga si City Administrator Em Ang, nagaplano sila nga magpatuman sang pito ka adlaw nga home quarantine sa mga maga inabot nga OFW sa siudad kun gikan sila sa mga pungsod nga may positibo nga kaso sang bag-o nga variant sang virus.
Sa karon, may yara na sang travel ban nga ginpatuman ang gobyerno para sa mga residente sang mga pila ka mga pungsod nga may positibo nga kaso.
Ang mga nagapinauli nga OFW gikan sa ini nga mga lugar ang ginapaidalum sa RT-PCR test kag katorse nga adlaw nga quarantine sa Metro Manila antes makapauli sa ila tagsa ka mga probinsya.
Luyag sang EOC nga sa ila pagpauli sa Bacolod magapaidalum pa gid sila sang pito ka adlaw nga home quarantine.
Pero ginatun-an pa ini sa karon sang City Legal Office kag sarang lang mapatuman kun magpagwa na sang executive order ang alkalde.