Anum ka mga Job order workers gina-usisa angut sa alegasyon sang korapsyon sa BTAO.
Sa gin-submit nga initial findings sang City Legal Office,may anum ka mga job order workers ang ila pa karon padayon nga gina-usisa angut sa kahilabtanan sa pag-cancel sang mga citation tickets nga gin-issue sang Bacolod Traffic Authority Office. Suno kay City legal Officer Romeo Carlos Ting, Jr. ang alkalde lamang ang authorized nga mag-cancel sang citation tickets.
Sa mga na-review nila nga mga citation tickets pito ang napat-ud nga ginpang-cancel. Dugang ni Ting nga ila pa padalman ang pagpang-usisa bisan pa pila sa anom ka mga JOs ang naghalin na sa trabaho.
Ang city legal office ang ginmanduan ni Mayor albee Benitez nga mangusisa matapos ginhinyo sang konseho nga ma-imbestigahan ang reklamo angut sa korapsyon sa BTAO.