59.40 percent sa target sang probinsya ang fully vaccinated sa January 30 nga report sang Provincial Health Office.
Sa amo nga report nagakasayuran nga 1,084,254 sa target nga 1,825,370 ang fully vaccinated sa Negros Occidental. 69.07 percent naman sa target ang nakabaton sang at least one dose sang bakuna.
Damlag pa, gintarget sang probinsya nga sa bulan sang Pebrero, malab-ot na ang herd immunity.
Suno kay Negros Occidental Governor Eugenio Jose Lacson, mas pabakuron pa gid sang probinsya ang mga tikang sini bahin sa kampanya para sa bakuna para malab-ot ang amo nga target.
Ang pag-igo ni bagyo Odette bisan pa ang pag igo man sang Covid–19 sa mga health care workers pila sa mga rason nga nag apekto sang vaccination program.
Sa pihak nga bahin, ang bilog nga western visyas ang naga pabilin nga critical risk area sa Covid-19 sa idalom sang alert level 3 suno sa Department of Health.
Nagsaka sa 224 percent ang kadamuon sang kaso sang Negros Occidental sa nagligad nga duha ka semana suno sa DOH.
Pero ginsiling man sini nga ang health care utilization rate sang Negros Occidental ang yara sa moderate risk.