500,000 nga tourist arrivals ang target sang probinsya para sa 2022.
60 percent ini nga saka sa 311,577 nga tourist arrivals nga na record sa 2021.
Positibo si Negros Occidental Governor Eugenio Jose Lacson nga malambot ini, labi na karon nga nag halog na ang travel requirements padulong sa Negros Occidental.
Wala na sang S-PaSS kag kun bakunado ang vaccination card na lamang ang gina kinahanglan.
Sa January to February 2022 nga tourist arrival data, 38,588 ang mga domestic tourist nga nag overnight, 52 naman ang foreign tourists.
65,910 naman ang mga day visitors.
Samtang may 196 ka mga open sites karon ang probinsya nga sarang mabisitahan sang mga turista.
Padayon naman ang paghaylo sa mga establisimiento nga mga pa accredit sa Department of Tourism agudto sila man ang maka avail sa ano man nga mga benepisyo nga ma tanyag sang gobyerno.
Tuman nga na apektuhan ang tourism industry sang mag igo ang Covid – 19.
Sa 2020 nga datus kun ipaangid sa 2019 nga pre pandemic time, 75 percent ang gin nubo sa tourist arrivals.
Gina lauman ang amat-amat nga pagbangon sang industriya. Sa 2021 nga datus 53.7 percent ang ginsaka sa tourist arrivals kun ipaanggid naman sa 2020 nga datus.