Padayon ang pursuit operation sang Silay City PNP sa duha ka motorcycle-riding suspects nga responsable sa pagpaniro sang tatlo ka mga persona sa nagkalain-lain nga lugar sa Silay City Hwebes sang hapon.
Nag gwa sa imbestigasyon sang Silay PNP nga bisan sin-o lang ang malabayan kag makursonadahan.. amo ang gintiro sang gunman nga backrider sa motorsiklo nga ginamaneho naman sang iya upod.
Ginsiling ni Lt. Col. Mark Anthony Darroca, hepe sang Silay PNP, nakilala na ang gunman kag naka-istorya siya sa iya himata nga sang tinalikdan nga semana nga may mga nagalagas sa iya nga 20 ka tawo.
Posible naga hallucinate lang ang suspek suno sa PNP.
Gikan sa Sitio Beranio, Barangay Lantad sa Silay kag padulong sa Rizal Highway ang mga suspek sang ila gintiro kag naigo sa nawala nga paa ang 47-anyos nga security guard nga nagasakay sa motorsiklo.
Sang makalab-ot na ang mga suspek sa highway, ila naman gintiro ang 52-anyos nga e-bike driver, nga naigo sa iya tyan.
Naglagyo ang mga suspek padulong norte kag sang sila ang makalab-ot sa atubang sang Alegria Subdivision, ila gintiro sa alatrasan ang 45-anyos nga maintenance personnel nga nagamaneho sang iya Honda Beat nga motorsiklo.
Gindala ang mga biktima sa hospital kag na-operahan na ang duha sa ila, samtang under observation naman ang isa.
Nakarekober sang kapulisan ang duha ka slug sa mga crime scene kag gin-subject na ini sa ballistic examination.