Ini ang nag viral nga video sang anum ka mga Pinoy seaman nga nagapangayo sang bulig para lang makapauli sa pungsod.
Tatlo sa ila mga Negrense nga nag abandon ship agud makaluwas sa ginakabig nila nga mala-impyerno nga kahimtangan sa sulod sang ginanubrahan nga Chinese fishing vessel sa pungsod Fiji.
Ginpalab-ot sanday Bacolod City mayoralty candidate Albee Benitez kag 3rd District Congressman Francisco Benitez ang problema sang mga seaman.
Gani sa bulig man sang mag utod nga Benitez upod sa OWWA, natigayon nga nakapauli kahapon sanday Edwin Ursula kag Richard Amar, sang Bacolod City, kag Nick Avelino, sang banwa sang Murcia.
Istorya nila, nagpasimpalad sila nga magtrabaho sa luwas kag nag apply bilang mga mananagat sa Britmark Shipping Services Incorporated agud kuntani malabulig sa ila pamilya.
400 us dollars ukon masobra sa biente mil pesos ang bulanan nga sweldo nga gin promisa sa ila.
Marso beinte otso sang naghalin sila sa pungsod pakadto sa Fiji.
Wala sila maglaum nga sa pagsugod nila sakay sa Chinese fishing vessel para mangisda, ma agyan nila ang tuman nga kakapoy sa sulod sang 22 oras nga ubra kada adlaw.
Si Edwin Ursula nagsiling nga nagasululuka na siya sang dugo sa kakapoy kag daw haluson na sila makapahuway kag makakaon sa sulod sang barko.
Sang Abril nuebe, nag desisyon na sila nga mag abandon ship sang mag dungka ang fishing vessel sa suva port para magpakaayo sang maguba ang makina.
Sa ila pagpauli tuman ang pagpasalamat sang mga seaman sa mag utod nga Benitez kag sa katapo sang OWWA.
Upod sang tatlo ka mga Negrense nga nakapauli sa pungsod ang tatlo pa ka mga Pinoy seaman nga taga Zambales, Batangas kag Manila.
Sa karon ila naman ginapaligban ang pagpangita sang trabaho agud man makabayad sa ila mga nautangan antes nagpasimpalad trabaho sa luwas pero naga pasalamat sila sa gihapon kay tigayon sila naka balik sa ila nga mga pamilya.