Nag padayon ang pursuit operation sang tropa sang 94th Infantry Battalion gani sang Sabado liwat sila nag engkwentrohanay sang miyembro sang New People’s Army.
Ini ang ika apat nga encounter humalin sang Hwebes. Suno kay Brigadier General Inocencio Pasaporte, commander sang 303rd Brigade, natiruhan ang walo tanan ka mga army sa tunga sang enkwentro batuk sa mga rebelde. Duha ang napatay.
“During maneuver lang sang tropa, amo na na nga unfortunately naigu sila, while maneuvers towards sa location sang mga armado nga NPA.”
Sila amo sanday Corporal Christian Drilon nga taga Iloilo kag Corporal Rex Verde nga taga Guimaras. Ang anum naman nga pilason amo sanday Corporal Joey Gardose, Private First Class Rolly Rama, Private First Class June Fuentes, Private First Class Lander, Private Wilchor Recaña kag Sergeant Edgiel Ucag. Indi naman mapat-od sang army kun may patay sa bahin sang NPA pero may mga traces sang dugo suno kay Pasaporte.
“Indi namon ma siling kun may napatay sa ila, sila ma declare. Pero nakita man naton bisan may napatay sa actual indi man nila pag declare na amo na siling naton nga makaluluouy lang tu mga pamilya nga wala nila mabal-an nga ara lang no, ilubong lang na sila dira.”
May mga armas, bala, backpacks, dokumento kag iban pa nga pagkabutang nga na recover ang army sa encounter site. Padayon ang ila sa gihapon nga pursuit operation. Ginpasidunggan naman sang army ang mga napatay nga suldado. Ang anum ka mga pilason nga army nga karon gina bulong sa ospital ang nag baton man sang wounded personnel medal.