Dakop sa duha ka separado nga police operations sang weekend ang duha ka mga persona nga ginatudlo amo ang nag hold-up sa isa ka doktora sa Barangay 19, Bacolod City sadtong Mayo 28 sang gab-i.
Una nga nadakpan amo si alyas “Rem”, 37-anyos, residente sang Brgy. 40 sa ginhimo nga operation sang Station 1 sa barangay hall sang Brgy. 40 sadtong Sabado, Mayo 30.
Ang ikaduha nga suspek nga si alyas “Shander”, 32-anyos, taga Brgy. Cabug sa Bacolod ang nadakop sang Domingo sang kaagahon, Mayo 31 sa joint operation sang Station 1 kag City Intelligence Unit.
Narekober sang kapulisan ang duha ka cellphones sang biktima, pati na ang motor nga gingamit sang mga suspek.
Positibo nga ginkilala sang biktima nga si alyas “Jireh” ang duha ka mga suspek nga amo ang nag hold-up sa iya samtang siya ang nagalakat pakadto sa iya apartment.
Nakuhaan sang closed-circuit television camera footages ang pagtinguha sang doktora nga makapalagyo, ang paglagas sa iya sang isa sa mga suspek kag pagkuha sang iya bag.
Antes madakpan ang mga suspek, nagtanyag ang Bacolod City Police Office kag Bacolod Mayor Greg Gasataya sang P200,000 nga padya sa makahatag impormasyon agud madakop ang mga suspek.
Nagapangabay si Police Col. Eugene Rebadomia, city director sang BCPO sa mga biktima sang mga kawatan nga kung mahimo mag-file gid sang kaso kung ma-identify ang mga robbery suspects.*
[sibwp_form id=1]