May 14 ka mga baboy nga wala sang nagakaigo nga papeles ang tigayon nga na intercept sa siudad sang Escalante kahapon.
Suno kay Arsolene Cordova ang head sang livestock section sang City Agriculture Office sang Escalante City, ang mga baboy nakit-an sa Berden Beach Resort sa Brgy Rizal kahapon mga las otso sang aga.
Gin-unload gikan sa pumpboat ang mga baboy kag ginkarga sa canter kag na intercept sang mga tanod sa dalan.
Ginsiling sang mga gin-usisa nga gikan sa Molocaboc sa Sagay City ang mga baboy pero suno kay Cordova sila ang naga duda sini labi na nga wala man sang papeles ang natungdan nga mga baboy.
Paathag ni Cordova bangud sang kakulang sang dokumento indi pwede mapasulod ang shipment sang baboy labi na nga naga pabilin ang ban sang probinsya sa pagsulod sang baboy gikan sa mga areas nga infected sang African Swine Fever.
Ginpabalik sa pumpboat ang mga baboy, pero suno kay Cordova may report sila nga nabaton nga liwat na intercept ang amo nga shipment sa Calatrava.
Ginkumpirma ini ni Provincial Veterinarian Dr Placeda Lemana kag gin-confiscate ang amo nga shipment sa Calatrava.
Padayon nga hugot ang pagbantay sa mga puerto kag boundaries dala man sang bag-o nga ASF cases nga na report sa Valencia sa Negros Oriental.