Nagsaka sa 11 ka mga barangay sa siudad sang Himamaylan ang may yara sang water shortage.
Suno kay Mayor Raymund Tongson, 11 na karon sa 19 ukon mayoriya sa mga barangay ang may water shortage. Suno sa alkalde sa tuman nga kainit sang panahon, pati mga deep well naga ka wad-an sang tubig.
Ginapasiguro sang siudad suno sa iya nga masolusyonan ang problema. Naga panagtag sang drinking water ang siudad sa mga apektado nga lugar. Naga butang sila sang hose sa mga may yara pa sang water source para mahatagan ang yadtong wala na sang tubig.
Nagpahamtang sang daw kasubong water station ang Himamaylan para may makuhaan sang tubig ang ginakulang.
Nakabulig man ang ginpadala sang probinsya nga water filter machine. Ang waste water gikan diri ang gina hatag man agudto magamit bisan sa panglaba suno sa alkalde.
“Gina maximize namon anay ang para ma usar anay sang pumuluyo within the area. Gina area per area namon, including sa mga nagakinahanglan jetmatic pump ginatagaan namon support.
Basically anything nga pwede namon mahimo nga service basta within lang sa resources gina obra namon case to case basis” suno kay Tongson.
Paathag ni Tongson wala pa man ang El Nino may pag panghangkat na sa supply sang tubig nga gina atubang ang Himamaylan.
Ang mga apektado naman nga palay farmers napanghatagan na sang vegetable seedlings.
Damlag pa, upod ang katapo sang Office of the Provincial Agriculturist ginapatigayon ang validation activity para mapat-od ang kadakuon sang epekto sang El Nino sa mga mangunguma.
Pila sa mga lugar nga damlag pa nag report apektado sang El Nino amo ang Carabalan, Tooy, Cabadiangan kag Mahalang.
Gina finalize pa ang datus kag ginahulat suno kay Tongson ang rekomendasyon kun bala maka deklara sang state of calamity ang siudad.
“(ano kadako sang population nga affected. You’re considering declaring state of calamity or not yet as of this time?) Gina pa finalize pa namon sa council”, suno kay Tongson.