Gin-alegar nadulaan sang kontrol bangud sa ginakay-o nga dalan ang driver sang Suzuki APV rason nga nabungguan sini ang nasugata nga tricycle sa dalan pa Cegasco, Purok Busay sa Barangay Cabug, Bacolod City, Miyerkules, las 5 sang kaagahon.
Patay ang isa sa mga pasahero sang tricycle nga ginkilala kay Arasili Musni.
Samtang, pilason ang driver sang tricycle kag ang tatlo ka iban pa nga pasahero.
Nag-gwa sa imbestigasyon sang Traffic Enforcement Unit nga padulong sa east sang dalan ang APV nga ginamaneho ni Erwin Tajonera. Ugaling gin-alegar nadulaan sang kontrol si Tajonera bangud sang ginakaayo nga dalan kag nagsaylo sa pihak nga lane kun diin ginbungguan sini ang nagasugata nga tricycle.
Bangud sang impact, pareho nga wasak ang pang-una nga bahin sang APV kag tricycle.
Naabtan sang rescuers ang pila ka mga pilason nga nagtabog sa karsada, samtang ang iban ang yara pa sa sulod sang tricycle.
Gindapatan ang mga pilason sang first aid kag gindala sa ospital.
Sa karon, padayon pa nga ginabulong ang apat ka mga pilason samtang detained naman ang driver sang APV sa Police Station 9.
Suno sa mga masami naga-agi sa lugar, masobra isa na ka tuig nga ginguba ang nasambit nga dalan kag sumugod sadto, madamo na ang nagluntad nga insidente diri. Kaina gilayon ini nga ginkaayo kay may napatay na.