Patay ang angkas sang motorsiklo samtang pilason naman ang driver matapos mag bunggo kahapon sang kaagahon ang ila nga motor sa truck nga kargado sang tubo sa crossing sa Barangay Lag-asan sa Bago City.
Ang napatay amo si Sanny Salcedo, 24 anyos kag pilason naman ang 18 anyos nga si Alexander Arnaiz. Suno sa Bago PNP, madasig ang pagpadalagan sang motor kag wala niya natalupangdan nga yara na sila sa crossing gani nag bunggo ini sa likod nga bahin sang nagadalagan man nga truck.
Samtang, pilason naman ang duha ka sakay sa tricycle matapos sila mabungguan kaina sang kaagahon sa Barangay Calumangan. Suno sa pulis, nag untat sa tunga sang dalan ang tricycle bangud ma left turn kun tani ini apang wala ini gilayon makita sang naga sunod nga commuter van bangud nga wala man sang tail light ang tricycle.
Gani nabungguan ini sang van.
Nag labog sa pihak nga lane ang tricycle kag nabungguan naman sini ang naga pasugata nga dump truck.
Padayon nga ginabulong karon sa ospital ang driver sang tricycle nga si Jerold Medel kag sakay nga si John Dee Alveso.