Patay ang isa ka tricycle driver nga si Edmund Bercinilla kag pilason ang pasahero niya matapos nga mapilpilan sang truck nga may karga nga tubo sa diversion road, Hacienda Leonor, Brgy. Paraiso sa Sagay City sang kagab-i.
Suno sa kay Police Lieutenant Colonel Alvimar Flores ang hepe sang Sagay City PNP, naga pagwa ang isa ka truck nga may karga nga tubo padulong sa national road sang naglabay ang isa ka wing van nga halin sa Cadiz pa Sagay.
Nakita sang driver sang wing van ang truck kag hana na ini nga magpondo ugaling nalab-ot niya ang truck. May natabuan pa gid nga naglabay man nga isa ka prime mover nga may karga nga tubo kag naigo man sini ang nag bungguanay na nga mga truck. Natumba ang prime mover kag napilpilan ang naglabay lang man kuntani nga tricycle.
Pilason man ang driver sang mga truck.
Dugang pa ni Flores, gilayon nga gintinguhaan nga makuha ang mga napilpilan sang truck apang nadugayan bangud madamo sang karga nga tubo. Patay na sang mag abot sa ospital ang driver sang tricycle nga si Bercinilla.
Nagapadayon pa ang imbestigasyon sang Sagay PNP sa sini nga insidente.