Patay ang menor de edad nga driver, samtang pilason ang duha niya ka mga angkas sa pagkarambola sang SUV, Canter kag motorsiklo sa national highway sang Barangay Abu-Abo, banwa sang Murcia sang Domingo.
Suno kay Police Capt. Honey Labaro, hepe sang Murcia PNP, padulong sa direksyon sang Bacolod City ang SUV kag ang canter. Apang ang motor nga gina sundan sang SUV nag-left turn, gani naghinay-hinay ini kag nag-preno.
Ang nagasunod nga canter ang na alang-alang kag nakabunggo sa SUV antes ini nagsaylo sa pihak nga lane, kag nabungguan ang isa pa gid ka motor nga nagapadulong.
Gina-maneho sang 17-anyos nga babaye ang motor kag angkas sini ang duha pa gid ka mga babaye, naga-edad 17 kag 21 anyos, tanan residente sang Brgy. San Miguel sa Murcia.
Bangud sang impact, nagtabog kag nagdasok sa sulod sang kalog ang driver kag ang isa ka angkas.
Gin-deklarar nga dead on arrival ang lady driver samtang nagapa-ayo na ang duha ka pilason nga backriders.
Suno kay Labaro, gin-release ang driver sang Canter matapos mag-lapse ang reglementary period sang iya detention.*