Duha ka tuig nga wala naga-operate ang X-ray machine sa City Health Office sang Bacolod. Mga X-ray films nga expired natukiban man sa ginpatigayon nga inventory.
Natukiban sang inventory team sang siudad sang Bacolod, nga sa sulod sang duha ka tuig guba ang X-ray machine kag expired ang mga X-ray films sa City Health Office. Suno kay Atty. Karol Joseph Chiu, ang city legal officer, bangud sini, ang mga pasyente nga kinahanglan mag pa X-ray gina refer sa iban nga pasilidad.
Dugang pa niya nga wala sang bisan ano nga report nga nag halin sa pasilidad nga nag pabalo nga guba na ang machine, bisan pa nga duha na ka tuig ini nga wala naga-operate.
Suno kay Chiu, importante nga gina maintain ang mga makina kag kagamitan sa mga health facilities agud masiguro ang husto nga serbisyo sa publiko.
Samtang, natukiban man sa inventory nga may mga rabies vaccines na nga malapit na mag-expire, kabangdanan nga ginahinyo sang siudad ang mas maayo nga monitoring kag inventory system para malikawan ang pareho nga insidente.
Gina-review na karon sang siudad ang mga proseso sa idalom sang City Health Office agud masiguro nga ang mga kagamitan kag serbisyo epektibo kag available para sa tanan nga pumuluyo.