Ginsuguran na sang Department of Public Services ang pag-operate sang weighbridge sa sanitary landfill sa Barangay Felisa sa Bacolod.
Suno kay Ma. Fe Tresfuentes, OIC sang DPS, ginalauman sang siudad nga mas mapabaskog man ang paghakot sang basura sang IPM-CDC nga amo ang private garbage collector sang siudad.
Sandig sa nakasugtan, P1,250 per ton ang suktanay sa tunga sang siudad kag IPM para sa mahakot nga basura pakadto sa landfill.
Nalakip man sa P220M nga kontrata ang P63M nga pondo para sa pag-maintain sang IPM sang sanitary landfill.
Ginahulat naman karon sang DPS nga matigayon na ang pag-release sang pondo nga maga gikan sa P4.4B loan agreement agud nga matigayon ang expansion sang landfill sang siudad.