Wala sang ghost project – ini ang nangin resulta sang ginhimo nga imbestigasyon sang Council of Concerned Citizens sa ginhimo nga inspeksyon sa flood control projects sa Bacolod.
Pero may mga ginakabig ang grupo nga kwestyunable nga mga bagay sa bahin sang kalidad, bidding process kag iban pa nga aspeto sang mga proyekto.
Ginpang isa-isa sang inspection team sang Council of Concerned Citizens, upod ang tiglawas sang Department of Public Works and Highways, City Mayor’s Office sang Bacolod, kag Lone District of Bacolod, ang apat ka mga nahuman na nga flood control projects sa siudad.
Ini ang naga lakip sang Lupit River Phase 7 flood control structure, Bakyas Creek revetment with floodwall kag ang Loygoy River revetment with floodwall.
2024 pa gin-report nga nahuman ang amo nga mga proyekto.
Sa Loygoy river may mga porsyon nga ginkaayo na. Sa paglantaw sang grupo kwestyunable ang pagbutang sang flood control project sa sini nga area, mas maayo kuntani kuno kun nag reforestation na lang.
Sa Lupit river naman suno sa grupo ang revetment concrete mix daw Class B, manubo ang shelf life kag indi sustainable. May mga gina kwestyun pa gid sila nga mga bagay kag nagakinahanglan pa sang dugang nga imbestigasyon.
Ang Bakyas Creek kag Ngalan River naga kinahanglan pa sang technical assessment ang kapag-on sang concrete mix kag kun nagakaangay gid man ang design.
Suno sa kay Atty. Cesar Beloria Jr., may mga technical, legal kag financial pa sila nga mga palamangkutanon.
Bisan wala sang ghost project, kwestyunable kuno ang design, integridad, bidding process, contractor accountability kag necessity sang mga proyekto.
Sa press conference kahapon ni Bacolod Mayor Greg Gasataya gina abi-abi niya ang imbestigasyon kun ang tinutuyo sini ang para sa transparency, kag validation sang mga proyekto.
Gina respeto niya ang katapo sang simbahan nga miyembro sang grupo nga nag inspeksyon pero kun lain na ang tuyo, mahibaluan man sang publiko.
Iban kuno abe sa miyembro sang grupo nangin kontra sang ila partido sang nagligad nga piniliay.