Sumugod sang Sabado, November 15, ginsuguran na ang closed season para sa sardines ukon tuloy, tamban kag tabagak, herrings ukon balantiyong, kag mackerels ukon guma-a, bulao kag hasa-hasa.
Buot silingon indi anay pwede magkuha sang sini nga mga isda sa porsyon sang Visayan Sea tubtob sa February 15, 2026.
Ini ang gin anunsyo sang Bureau of Fisheries and Aquatic Resources ukon BFAR.
Ang area nga nalakip sa closed season amo ang baybayon sang Escalante City, Negros Occidental pakadto sa ibabaw sang Sta. Fe, Cebu.
Ang ibabaw sang Madridejos, Cebu, pakadto sa Gigantes Island, Iloilo. Halin sa Olotayan Island pakadto Roxas City.
Ang tunga nga baybayon sang Iloilo kag Negros Occidental, ang boundary sang Talisay River sa Barotac Nuevo pakadto sa Tomontong Point sa EB Magalona pakadto sa Danao River.
Ang gina bansagan nga “Pahuway sang Baybay” ang isa sa mga tikang para mapadamo anay ang magagmay pa nga mga isda para sa sustainable fisheries production.*