Mga sidewalk vendors nga indi matagaan pwesto sa Libertad Market ipahamtang sa dalan Mabini.
May masobra sa 200 ka mga stalls ang natalana i-award sang siudad sa mga market vendors sang Libertad Public Market sa Enero 31.
Pero sa inventory sang Local Market Committee nagalab-ot sa 349 tanan ang mga manugbaligya nga temporaryo nga napahalin sa sulod sang ginkaayo nga merkado,
nalakip na diri ang mga sidewalk vendors nga napahalin na sa kilid sang mga dalan nga palibot sa merkado.
Suno kay City Administrator Pacifico Maghari, III, kutob lamang sa mga residente sang siudad nga naka-rehistro na ang sarang ma-accomodate sa sulod sang merkado.
Plano sang siudad nga italana ang portion sang dalan Mabini para sa mga registered sidewalk vendors pati na sa mga manugbaligya nga indi ma-accomodate sa sulod sang Libertad Annex Building.
Ginalauman sang siudad nga makadihon sang ordinansa ang konseho agud mapangitaan sang lugar ang mga vendors nga temporaryo nga naapektuhan ang palangabuhian.