Naglapta sa dalan ang mga biktima matapos ang pagbungguanay sang trailer truck kag tricycle sa kurbada nga dalan sang Hacienda Tipolo sa Barangay Camandag, sa La Castellana, Lunes sang hapon.
Patay ang duha ka mga pasahero sang tricycle.
Dead on the spot ang 18-anyos nga babaye, residente sang Brgy. Mansalanao sa La Castellana samtang kagab-i ginbawian sang kabuhi sa ospital sa Bacolod City ang 13-anyos nga lalaki, nga taga Brgy. Magallon Cadre sa Moises Padilla.
Base sa traffic investigation sang La Castellana PNP, naglikaw sa nagalabaw nga kawayan sa kurbada nga dalan ang trailer truck nga ginamaneho sang 35-anyos nga taga-Brgy. Robles sa La Castellana, rason nga nagsaylo ini sa pihak nga lane kag nabungguan ang nagapadulong nga tricycle.
Halin sa Igpanulong ang trailer truck kag padulong San Carlos City, samtang ang tricycle ang gikan sa Mansalanao kag pakadto sa proper sang La Castellana.
May apat ka mga pasahero ang tricycle nga ginamaneho sang 53-anyos nga driver, residente sang Brgy. Sag-ang sa La Castellana.
Bangud sang impact, nagtabog ang mga pasahero.
Nakaluwas sa insidente ang kapid nga sakay sang tricycle pati na ang driver.
Nagsungka naman ang driver sang trailer truck sa kapulisan.*