Indi lang kinawatan nga cellphone ang narekober sa isa ka teenager sang siya ang nadakpan sa merkado sang banwa sang La Castellana, Domingo sang hapon.
Nakuhaan man siya sang ginabulubanta 15 gramos sang ginasuspetsuhan shabu nga nagabalor P102,000.
Gindakup ang suspek nga si alias “Kulot,” 19-anyos, residente sang Moises Padilla kag subong nga adlaw, ipasaka batok sa iya sang La Castellana Police ang kaso nga theft in relation to Section 11 ukon possession of illegal drugs sa idalum sang Republic Act 9165 ukon Comprehensive Dangerous Drugs Act of 2002.
Suno sa 35-anyos nga biktima, naga-istorya siya sa iya bayaw sa gwa sang iya balaligyaan sang ginkuha sang suspek ang cellphone nga naka-charge kag gindalagan ini.
Ginrikisa ang suspek kag narekober sa iya bulsa ang cellphone, pati na ang walo ka pakete sang ginasuspetsuhan shabu, isa ka improvised straw nga may traces pa sang suspected shabu kag isa ka coin purse.
Ginsiling ni Police Major Rhojn Darell Nigos, hepe sang La Castellana PNP, ginpaidalum na ang suspek sa drug test kag kung magpositibo siya, magadugang sang Section 15 ukon use of illegal drugs ang iya kaso.