Wala sang coliform bacteria sa mga gin test nga water sample gikan sa tatlo ka mga deep well nga malapit sa gina istaran sang 37 anyos nga babaye nga nag ayo na sa cholera sa Barangay Mansiligan sa Bacolod.
Gani tubtob karon indi pa mapat-ud ni Dr. Grace Tan,pamuno sang Environmental Sanitation Division sang City Health Office kun ano ang kabangdanan nagka cholera ang pasyente.
Kasunod sang inspection, gin chlorinate na sang barangay ang amo nga water sources.
Agud mapasiguro nga mapaiway ang bacterial disease, gin recommend sang Environmental Sanitation Division sang City Health Office ang temporaryo nga pag untat sang pagbaligya tubig sang 61 ka mga water refilling station nga wala sang mga permit.