Nagapabilin nga wala sang kaso sang MPOX sa Bacolod. Ini makaligad nga nag-negatibo sa mpox ang tatlo sa apat ka mga sample specimen nga ginpadala sang Bacolod City Health Office sa Research Institute for Tropical Medicine humalin sang nagligad nga sinemana.
Ginsiling ni Environmental Sanitation Division head Dr. Grace Tan nga kadam-an sa mga nakuhaan sang sample specimen mga lalaki nga nagbatyag sang paghilanat, pagpanalakit sang lawas nga may unexplained rashes.
Sa council meeting sang katapo sang Committee on Health sang konseho, nadesisyunan ang pagtalana sang anay evacuation center sa Barangay Vista Alegre bilang isolation center.
Gindugang ni Tan nga sandig sa pagsulundan sang Department of Health ginakinahanglan nga mapaidalom sa quarantine ang mga pasyente nga symptomatic.
Pero indi na ginakinahanglan nga magpatuman sang community quarantine ukon lockdown kasubong sang nagligad nga pandemic.