Tatlo ka mga barangay sa La Castellana kag isa ka sitio sa Canlaon City ang nag-report sang manipis nga ash fall.
Suno kay John de Asis ang Municipal Disaster Risk Reduction Management Officer sang La Castellana, wala labot sa ash fall may napanimahuan man nga asupre sa natungdang nga mga lugar.
Suno kay de Asis ila gina pahanumdom ang publiko nga mag gamit sang face mask bilang proteksyon labi na ang mga may edad kag may respiratory nga masakit.
Ang Brgy Cabacungan, Cabagnaan kag Biak na Bato suno sa iya ang nag-report kahapon sang manipis nga ash fall. Wala naman sang may na report pa subong nga adlaw bangud ang direksyon sang hangin padulong na sa east suno sa iya.
Ginsiling naman ni Mari-Andylene Quintia ang resident volcanologist sang Kanlaon Observatory sa La Carlota nga ang Sitio Upper Pantao, sa Brgy Pula sa Canlaon City ang nag-report man sang ash fall mga las 7:30 kaina sang aga.
Sa November 6 nga Phivolcs monitoring report, may 2,066 ka tonelada ang sulfur dioxide flux, nag nubo man pero mataas sa gihapon kun ipaangid sa baseline sini nga 300 ka tonelada.
Ginsiling naman ni Dr Girlie Pinongan ang Provincial Health Officer nga sa ila nga November 5 nga monitoring wala pa man sang may nag report nga respiratory related illnes sa mga lugar nga malapit sa bulkan Kanlaon.